Immami sikoqanngitsumi uummassusillit

Krill (Meganyctiphanes norvegica) Kalaallit Nunaata kangiani kitaanilu imartani kujasinnerusuniittuni nerisareqatigiinnermi ilaavoq pingaaruteqartoq.
ØYSTEIN PAULSEN/MAR-ECO, CREATIVE COMMONS, 2005

Upernaap ingerlanerani sikuernerani aammalu qaamaneq imaanut appakaassinnaaleraangat, immap ilua sarfarujussualertarpoq. Immap sikuata aannerani immap qaava tarajoqanngitsumik imeqalertarpoq, tassanilu naasut immap ikerinnaaniittut seqernup qinngornera iluaqutigalugu annertuumik naajoralertarlutik. Inuussutissat imaani tarajoqarnerusumi itinerusumiittuneersuusarput, kisianni aasap ingerlanerani immap qaavaniittoq imeq annertuumik akuleruttarpoq, pingaarnertut naajorarnerit annertussutsiminni annikillisarlutik aammalu itisunerusuniittuni pilertarlutik. Sikup qaamanerullu piffissani aalajangersimasuni takkuttarnerisa kingunerisaanik Kalaallit Nunaata eqqaani imartani pinngorartut ukiup qanoq ilinera apeqqutaalluni annertuumik akuttoqqatigiissaartarput, allorniusanit sanimukartunit appasinnerusuniittunit allaanerusumik. Akuttoqqatigiissaarneq taanna immap ikerinnaaniittunut uumasuaqqanut, nerisaqaqatigiinnermi tulliusuni, pingaaruteqartorujussuuvoq. Illeqqat imaani itisuumi ukiisartut, upernaakkut naasut immap ikerinnaani naajorartut neriniarfiginiarlugit immap iluani qummukalersarput. Illeqqat pualasuut aalisakkat qullugiaannit aammalu timmissat arferillu ilaannit nerineqartarput, taamaalillutillu nerisareqatigiinnermi nukissamik ingerlaartitsinermi ilaalluni pingaaruteqartoq, assersuutigalugu omega-3-fedtsyrit, taamaalillunilu aamma aalisarnermut aalisakkanik nutaanik pissarsititsisarluni.

Tunumi aamma Kalaallit Nunaata kitaani kujasinnerusuniittuni, imartani kissarnerulaartuni ukiukkullu sikusanngitsuni, atlantikup avannaani uumasut krill-it, pingaartumik naasuni immap ikerinnaaniittuni neriniartarput. Krill-it aalisakkat, timmissat uumasullu miluumasut imarmiut avannarpasinnerusuniittartut amerlasoorpassuit, taakkua ataatsimuuleraangata neriniarfiginiarlugit sumiiffinnut avannarpasinnerusunukartartut, aamma nerisaraat.

Immap kissatsikkiartornera imaani uumasuaqqat immap ikerinnaaniittut katitigaanerannut sunniisussaavoq, tamannalu imaani nerisareqatigiinnut tamaginnut sunniuteqartussaavoq.

Paasissutissat allat

Kalaallit Nunaat pinngortitaa pillugu paasissutissat allat.