SSPL/SCIENCE & SOCIETY/RITZAU SCANPIX, 2003
Eqalussuaq Kalaallit Nunaanni sumiluunniit takussaavoq aammalu nalinginnaasumik Atlantikup avannaani imaani nillertumiittuulluni, tassani immap qaavaniit 3 km-inik itissusillit tikillugit takussaasarluni. Sorsunnersuit aappaat tikillugu eqalussuaq, ilaatigut maskiinanut uuliatut atorneqartartumik, nalituumik tinguini uuliaqarnera pissutigalugu niuerutigineqartussatut pisarineqartarpoq. Ullumikkut eqalussuit qaleralinniarluni aalisarnermut akornutaaneruvoq, aammalu eqalussuup neqaa qimmit nerisassaattut taamaallaat atorneqartarluni.
Eqalussuaq kingusissukkut kinguaassiorsinnaalertaraluartoq aammalu ikittuinnarnik piaqqisaraluartoq, eqalussuit Atlantikup avannaaniittut siusinnerusukkut niuerutigineqartussatut pisarineqartarsimanertik anigorsimavaat. Oqaluttuarisaanermi pisarineqartarsimagaluartut, eqalussuit uumasuunerat taakkualu pinngortitap ataqatigiinnerani pingaaruteqarnerat pillugu ilisimasat annikitsuaraannaapput. Suut tamaasa nerisarsimavaat, tassami siuteqqut, aalisakkat assigiinngitsorpassuit, puisit allaat arferit angisuut sinnikui eqalussuit aqajaruini nassaarineqartarsimapput. Eqalussuit taamaallaat silusiat ujartarneraat, imaluunniit sukkasuujunersut uumasunik pisaqarsinnaallutik, soorlu assersuutigalugu puisinik, akuttunngitsumik aqajaruini takuneqartartunik, ilisimaneqanngilaq.
Eqalussuit immikkuullarissutiginerpaavaat ukiut 200-300 angullugit uumasinnaagami, taamaalillunilu nunarsuarmi uumasunut sivisunerpaamik uumasartunut ilaalluni. Tamanna ilaatigut isaasa igalaartaasaannik Cc14 atorlugu misissueqqissaarnikkut paasineqarpoq, aammalu alapernaarsuinernit, eqalussuit arriitsuaraararsuarmik alliartortartut takutitsisunit, uppernarsarneqarluni.
Paasissutissat allat
- Uumassusillit assigiinngisitaarnerat aamma pinngortitap aqutsivigineqarnera
- Sineriak
- Immami sikoqanngitsumi uummassusillit
- Kalaallit nunaata imartaani puisit
- Imeq tarajuunngitsoq
- Immap naqqani uumasorpassuit assigiinngitsut
- Nanoq
- Imaq kangerluillu
- Arferit suussusai aammalu arfanniarneq
Kalaallit Nunaat pinngortitaa pillugu paasissutissat allat.
