Nerisassat

Kalaallit nerisassaataat pinngortitamit toqqaannartumik pissarsiarineqartarput. Oqaaseq nerivoq oqaluutaavoq oqaatsimullu taggimmut neqimut qanilluni, tassa oqaatsit taakku nagguiat ataasiulluni. Tamanna tupinnanngilaq, tassami nunasiaateqarnerup siorna inuit annertunerusumik neqitortuupput. Eqqarsartoqarsinnaagaluarpoq nerisaat assigiiaaginnartuusimasut, kisianni uumasut nerineqartartut assigiinngitsorpassuummata nerisat allanngorartuusimapput, tassani apeqqutaasarluni ukiup kaajallakkiartornerani neqissat assigiinngitsut allanngorartut periarfissaasarmata sinerissallu siamasissup tunniussinnaasai allanngorarsimallutik. Taamaammat Nanortalimmiup nerisassanik eqqartuileruni Uummannarmiup Ittoqqortoormiormiulluunniit eqqartugaanit allaanerusarpoq.

Uumasut ataasiakkaat atorluarsinnaaneri

Pinngortitaq uumasullu ilisimaarigaanni ukiup qanoq ilinera apeqqutaalluni atorluaanissamut periarfissarpassuaqarpoq. Tuttu nerisassanik assigiinngitsorpassuarnik imaqarpoq. Tuttup quttoraata suppaliassartaatalu saniatigut tuttumit mamartuliarineqarsinnaasut peqqinnartorpassuallillu arlaqarput, soorlu naatitat tuttup nerisimasai aqajaruaniittut. Uumasut allat aamma taamatut periarfissiipput, soorlu aarrit aqajaruanni uillut nassaarineqarsinnaasut. Uumasut allat, soorlu aalisakkat, puisit timmissallu mamartortalippassuupput piareersarluarlugit suliarigaanni.

Ukiut ingerlanerini ukiup qanorilinera apeqqutaatillugu nerisassat piniagassallu pissarsiarineqarsinnaasut avataatigut pisiniarfinnut pisiniarsinnaanerup periarfissat amerlisissimavai. Ullumi nerisassat akuutissallu allat, soorlu suaasat, uanitsut, naatsiiat iibilillu kalaallit nerisassaataannut akugissallugit pingaartinneqartalerput, naak tamakku avataanit tikisitaagaluartut.

Nerisassiorneq

Siornatigut aammalumi ullumi nerisassat uullugit uunnagilluunniit nerineqartarput. Nerisassat ilaat neqaat ooqqaarnagit, panertiinnarlugit qeritillugilluunniit, ilaatigullu uninngateqqaarlugit nutaanngilisillugit ilaat mikiarterlugit nerineqartarput, tassani peqqinnartortaasa allanngortinnginnissaat pineqartarluni.

Mattaat, ammassaat aalisakkallu panertut orsulerlugit, paqqaartut naatsiialerlugit, tuttut panertut ilaatigut naatitanik allanik ilallugit nerisassatsialattut mamarsaatigineqartaqaat. Tamakku kaffillernerni katerisimaarnernilu allani takussaasarput.

Kaffillertarneq

Kaffillertarneq kalaallit kulturianni qitiulluinnartut ilagaat, naak nunasiaataanerup nalaani aatsaat ileqquliunneqarsimagaluarluni. Kaffillerneq ulluni pingaaruteqartuni, soorlu inuuissiornerni, katittuni, kuisittoornerni, apersortitsinerni, meeqqap atualeqqaarnerani ilisisoqartilluguluunniit ingerlanneqartarpoq. Kaffillernerni angerlarsimaffik tamanut ammarneqartarpoq, kaffisorialli sivisuumik isersimaneq ajorput isertut amerlanerpaat issiavissaqarniassammata. Qaasut maluginiutaat tamarmik tinnersarneqartutut pilersarput iserfigisami kaagit nerisassallu tipigilluinnartut iserfigigaanni. Ilaqutariit assigiinngitsut tamarmik immikkut immikkuullarissumik qaaqquseriaaseqarput, nutarsaasoqartarporlu allani takusat aamma isumassarsiorfiusarmata. Taamaammat pissanganartarpoq tamatumuuna kaffisoriartorfiit allanngortiterisimassanersut takussallugu, ineriartortitsisoqartuartuummat.

Utoqqaat ilaasa eqqaamavaat ullaaralaaq aallartittarlutik. Ulloq sioqqullugu kaffiliassat piareersarneqassapput. Sassaalliutinut ilaasarput kalaallit kaagii, taakku kissarsuutikkut qalanneqarajuttarput.

Kaffillerneq aamma piniarnermut pinngortitamullu atassuteqarluarpoq, tassa ullumi aamma nukippassuit piffissarujussuarlu atorlugit tuttunniartoqarlunilu piniariartoqartarmat kaffillernissamut katersisoqarluni. Ilaqutariit arlallit sulinngiffeqarnertik atortarpaat pilillutik, eqalunnik pujooralutik, mamartutuutissanik piareersarlutik. Kaffillertarneq ullumikkut kalaallit nerisassaannut nereriaasiannullu pingaaruteqarluartuuvoq.

Nerisat piujuartitsinerlu

Ukiuni makkunani nerisat piujuartitsinissarlu oqallisigineqaraluttuinnarput. Tamanna isumaqarpoq neqitornikinnerulerluni naatitartornerulerneq. Maani tamanna ajornakusuussaaq naatitat avataanit eqqussukkat nerisarineqarmata kulturilu piniarnermik uumasunillu atuineq ileqqorineqarluni. Tamaammat piujuartitsineq tamaani allatut isigineqarpoq. Kalaallinut issittumilu inunnut allanut piujuartitsineq Sassuma Arnaanik oqaluttuamik takussuserneqarsinnaavoq. Oqaluttuatoqqap ilinniartippaatigut inoqativut, uumasut allat inuuffigisarpullu isumassorlugit paaralugillu pinngikkutsigit pinngortitap pisuussutai tammariaannaasut.

Paasissutissat allat

• Illulioriaaseq
• Kalaallit Nunaani timmissat assigiinngitsut
• Piniarneq aamma nammineq pisanik pilersorneq
• Kalaallit nunaata imartaani puisit
• Ileqqut oqaluttuallu
• Arferit suussusai aammalu arfanniarneq

Kalaallit Nunaanni kulturi pillugu paasissutissat allat.