Kalattuut

Nutsugiartussaq piareerpoq, inuillu assukkersorsimasut 1800-kkut naalerneranni kaavikuloornissaminnut piareerput. Nunaqarfinni ukiorpassuit ingerlaneranni narsaamanerni qitittoqartarsimavoq, kingusinnerusukkut niuertoqarfiit illuutaanni qitittalerlutik. Nunaqarfiit ilaanni qitittarfiusarsimasut ilaat suli ersipput.
ARKTISK INSTITUT, 1880

Arfanniat nunani allamiut siullersaallutik europamiut nipilersuutaat qiteriaasiallu nunatsinnut eqquppaat. Inuit arfanniallu niueqatigiittarput, kulturikkullu naapinnermi qiteriaaseq kalattuut eqqunneqarpoq. Ilimanarpoq qiteriaaseq sukkasooq reel 1585-imi nipilersorneqarlunilu qitinneqartartoq, taanna siullermik tamaani nipilersorneqarami.

1721-p kingorna danskit norskillu amerliartuinnartut tikittalerput, taakkulu ilaasa nunaminnit erinnat qiteriaatsillu aamma tikiussimassavaat. Taamaammat sumiiffinnit sumiiffinnut qitittarneq assigiinngiiaarpoq.

Kalattuut assigiinngillat, soorlu arfineq pingasooq, sisamaaq allatullu sanileriikkaarluni kalattooriaatsit. Assigiinngitsut amerlanerusimapput, taamanilu nuutit isikkallu inissinnissaat allanneqarneq ajormata ilimanarpoq ilaat puigorneqartarsimassasut.

1850-ikkunnit kalattooriaatsit nuannarineqarnerit kaavikulooq akulikitsoorlu qitinneqarnerujartorput. Tamani taamatut qitittoqartarpoq, kalaallisuulerluni takutitsilluni amerlanertigullu katerisimaarnerni nuannannernilu qitinneqartarlutik.

Agiaq nutsugiarlu nipilersuutitut atorneqarnerpaapput, ullumilu immiuteriikkat qitinnermi atorneqarnerullutik.

Kalattuut immikkuullarissutigaat sukkasuumik periuseqarluni qitinneqartarnertik tukkarsortoqartarneralu. Angutit sukkasuumik tukkarsortut; arnat isikkatik perralisaartittarpaat.

Paasissutissat allat

Kalaallit Nunaanni kulturi pillugu paasissutissat allat.

  • Susanne Andreasen

    (in. 1978) Pissanganarsaarinermi bachelori. Kalaallit Nunaata Isiginnaartitsisarfiani pisortaq.

  • Ruth Montgomery-Andersen

    (in. 1957) Dr.ph., ernisussiortoq, qitittartoq aamma koreograin. Kalaallit Nunaanni qitinnermut ilinniartitaanerit siullersaannut pisussanut pilersaarummut ilisimatusartoq aamma suliniummut aqutsisoq.

  • Arnajaraq Støvlebæk

    (in. 1976) BA Islandimi Kunstakademi-miit. Namminersortoq.

  • Andreas Otte

    (in. 1983) Musikantropologi-mi ph.d. Odense-mi Nordatlantisk Hus-imi paasissutissiisartoq.

  • Inunnguaq Petrussen-kl

    (in. 1986) Cand.scient.adm. Inatsisartuni politikkikkut siunnersorti.

  • Poul Ole Ringsted

    (in. 1937) Meeqqat atuarfianni ilinniartitsisoq. Namminersornerullutik Oqartussani ilinniartitsisuuneq soraarneq.