Avinngaq issittumi nerisaqaqatigiinnermi pingaarutilinnut ilaasoq

Aasaanerani avinngaq qasersoq kajortumik qalipaateqartarpoq, tamannalu qaarsup nunaannaallu qalipaataannut ilassuuppoq. Taamaattoq ukialeraangat amia qaammariartortarpoq, nunalu apigaangat avinngaq qaqqoorissunngortarluni. Peqatigisaanik siulliivini kukiisa marluk ataanni naasoqartarpoq. Taakkua »Kukiit marloqiusat« nunap qerisup nungullartitsinissaanut akiuuttarput aammalu annertunerulaartumik oqorsaasertarlugu.
ERIK THOMSEN/BIOFOTO/RITZAU SCANPIX, 2008

Avinngat taakkuninngalu nerisaqartut kaaviiaartumik amerlassusaat nikerartartoq ilisimaneqarpoq. Avinngat ukiut sisamakkaapajaarlugit amerlasooriaammik amerlisarnerat uumasut qaasuttut piaqqisarnerannut pitsaasunik atugassaqartitsivoq, taamaalillunilu uumasut qaasuttut amerlanerulerlutik. Tamanna taakkuninnga nerisaqartut amerliartornerannik malitseqarpoq, taamaalillunilu avinngat annertuumik ikiliartorlutik. Avinngat ikinnerulernerisa kingunerisaanik nerisassaqarniarneq tunngavissaqannginnerulerpoq, taamaattumillu uumasut qaasuttut toqusartut amerliartorlutik. Taamaalilluni kaaviiaartumik ingerlasarnera ingerlaannarsinnaavoq.

Kalaallit Nunaanni avinngaq Tunup Avannaarsuani uumasuuvoq. Naasunik nerisaqartuuvoq pingaaruteqartoq aammalu uumasut qaasuttut, soorlu uppiit, papikkaat, ukaliatsiat terianniallu, pisarisartagaralugit pingaarutillit. Ukioq manna avinngat amerlasuujuneranni masarsoqarfinni timmissat piaqqisartut taakkuninnga nerisaqarnerat annikinneruvoq. Taamaalilluni avinngaq Kalaallit Nunaanni taamatullu Issittup sinnerani nerisaqaqatigiinnermi qitiusunut ilaavoq. Issittumi silap pissusaa allanngoriartorpoq, tamatumalu avinngat aammalu uumasut nerisaqaqatigiinnermi akuusartut atugarisaannik allanngortitsivoq. Issittumi sumiiffiit ilaanni avinngat amerlassusaasa kaaviiaartumik nikerarnerat ilisimaneqartoq takussaajunnaarsimavoq aammalu ukiut akornanni annertoorujussuarmik allanngorarluni takorloorneqareersinnaanngitsorujussuarmik allanngoralersimalluni. Tassunga takuneqartumut silap pissusaata allanngoriartornera qanoq pingaaruteqarnersoq, tamannalu Issittumi nerisaqaqatigiinni qanoq sunniissanersoq, suli ilisimaneqanngilaq.

Paasissutissat allat

Kalaallit Nunaat pinngortitaa pillugu paasissutissat allat.

  • Elmer Topp-Jørgensen

    (in. 1971) Uumassusilerinermi cand.scient. Institut for Ecoscience-mi immikkut siunnersorti, Aarhus Universitet.

  • Katrine Raundrup

    (in. 1976) Uumassusilerinermi ph.d. Pinngortitaleriffimmi ilisimatooq.

  • Tom Christensen

    (in. 1969) Cand.scient. Aarhus Universitet-imi Institut for Ecoscience-mi siunnersortit pisortaat.