ANINGAAQ R. CARLSEN/VISIT GREENLAND, 2021
Qeqqata Kommunia 64ºN-ip aamma 67ºNip akornanniippoq, pingaarnertullu illoqarfia Sisimiut Qaasuitsup avannaata tunginnguaniilluni. Kommuni 115.500 km2-inik annertussuseqarpoq. Kitaani 66º-imit avannamut qimmit qimuttut akuerisaapput.
Kommunimi innuttaasut katillugit 10.000-ingajaapput Maniitsoq illoqarfiit aappaat kiisalu nunaqarfiit katillugit arfinillit ilanngullugit, taakkunannga Kangerlussuaq annersaalluni.
Kangerlussuaq Kalaallit Nunaanni nunanut tamalaanut mittarfinni atorneqarnerpaavoq. Sermersuup eqqaaniippoq Sisimiunit kangimut 130 km-isut ungasitsigisumiilluni.
Kangerlussuup kangerluata qeqqata missaaniippoq anorthositimik aatsitassarsiorfik Hudson Greenland A/S-imit ingerlanneqartoq. Aatsitassarsiorfik pisortatigoortumik 2019-ip naanerani atoqqaartinneqarpoq, covid-19-ili pissutigalugu tunisassiorneq iluamik suli aallartissimanani. Tunisassiornerup nalaani sulisut 60-it missaanniinnissaat naatsorsuutigineqarpoq.
Kommuni 2009-mi pilersinneqarmalli Siumumit aqunneqarsimavoq kingullermillu 2021-mi qinersisoqarmat borgmesteri qinerneqaqqilluni. Kommunimi politikkikkut isumaginninnerup pitsanngorsarneqarnissaa, inuussutissarsiornermik ineriartortitsinerup, takornariaqarnerup, peqqinnerup pitsaaliuinerullu kiisalu pingaarnertut meeqqat atuarfiat inuusuttullu suliffeqanngitsut ukkataralugit ilinniartitaanerup siuarsarneqarnissaat salliunneqarput.
UNESCO-mut sumiifferujussuaq toqqarneqarsimavoq, Aasivissuit – Nipisaat, nuna 20 km-isut silissuseqartoq Sermersuarmiit Kangerlussuarmi mittarfik avannaqqullugu Sisimiut eqqaqqullugu, illoqarfilli pinnagu, 220 km-isut isorartutigisoq. Sisimiut Kangerlussuullu akornanni nuannarineqarluartunik pisuttunut aqquteqarpoq, aqqusinniorlunilu attaviliinissaq ataavartumik oqaluuserineqartarluni. ATV-nut aqqut pilersinneqaqqammerpoq atoriaannanngungajalerlunilu.
Aqqusineq taanna Kangerlussuarmi eqqaanilu aqqusinernut pioreersunut, Amerikamiunit pilersinneqarsimasunut Volkswagenimiillu (VW) Sermersuarmi biilernernut misileraaffimmut atatillugu Sermersuarmut 1999-imi ilaneqarsimasunut ilassutaassaaq. Kalaallit Nunaanni takinerusumik aqqusinermik taamaalilluni aatsaat sanasoqarpoq. Aqquserngup illoqarfiit anginersaata tullia nunanullu tamalaanut mittarfik atassusissavai, taamaalillunilu takornariaqarnermut aalisakkanillu nutaanik qeritinneqanngitsunik avammut tunisassiornissamut atatillugu ineriartortitsinissamut periarfissarpassuaqalersitsissalluni.
