Makka Kleist

Makka Kleist takutitassiami Arnatsialaat (The Rez Sisters). Tomson Highwaysip takutitassiaat siullermeersumik kalaallisut 2016-imi takutinneqarpoq. Isiginnaartitsisartunngorniat sisamat inaarutigalugu isiginnaartitseqataaffigaat, isiginnaartitsisartut allat, Makkalu peqatigalugit.
GERTH LYBERTH/NUNATTA ISIGINNAARTITSISARFIA, 2016

Isiginnaartitsisartoq oqaluttuartartorlu Makka Kleist (in. 1951) isiginnaartitsisarnerup ineriartortinnerani siuttut ilagaat. Qullissani inunngorpoq, 6. klasselu aallartittussanngoramiuk Danmarkimut aallartinneqarluni. Ilinniartitsisutut naammasseqqammerluni 1978-imi Tuukkaq Teatret-imut ilannguppoq, 1983-illu tungaanut isiginnaartitsisartutut, ilitsersuisutut isiginnaartitsissusiortutullu sulilluni. Taamatut aallarteriarluni kingusinnerusukkut ilaatigut Norgemi Canadamilu najugaqarpoq, isiginnaartitsisartuulluni, filmini inuttaasarluni meeqqanullu isiginnaartitsisarneq aallullugu, isiginnaagassianillu allallunilu nutserisarluni.

2003-mi Makka Kleist nunatsinnut uterpoq, ilaatigut Silamiuni sulisarluni aammalu nunatta isiginnaartitsisarfissaanik isiginnaartitsisartunngornianullu ilinniarfimmik pilersitsisoqarnissaanik suliniartunut akuulluni. Nunatta Isiginnaartitsisarfia 2012-imi atuutilermat Isiginnaartitsisartunngorniat Ilinniarfianni ningiunngorpoq 2018-illu tungaanut aqutsisuulluni. Tamatuma kingorna Danmarkimut nuuppoq.

Paasissutissat allat

Kalaallit Nunaanni kulturi pillugu paasissutissat allat.

  • Susanne Andreasen

    (in. 1978) Pissanganarsaarinermi bachelori. Kalaallit Nunaata Isiginnaartitsisarfiani pisortaq.

  • Ruth Montgomery-Andersen

    (in. 1957) Dr.ph., ernisussiortoq, qitittartoq aamma koreograin. Kalaallit Nunaanni qitinnermut ilinniartitaanerit siullersaannut pisussanut pilersaarummut ilisimatusartoq aamma suliniummut aqutsisoq.

  • Arnajaraq Støvlebæk

    (in. 1976) BA Islandimi Kunstakademi-miit. Namminersortoq.